Esperanto nane sâ? (Kio estas Esperanto?)

Esperanto nane uab-es lê mamoëk he nmânafab komunikasi antara to(b) humâ-humâ nbi pah-pinan i.

Fun mapakê praktis a-nnès nâko ton nautnes Esperanto njail uab amonit, lê nabè' natónnapoin ‘tebtebes kanan nuansa nâko mansian in tenab.

In uab internasional ma netral kun, fun in napalbon neu tuaf ok-okê ma in a-nmoê komunikasi antara tuaf ok-okê nbi pah-pinan, ‘tebtebes ka nok fa tendensi neu budaya (kultur), politik, laistoes (agama) aî hegemoni ekonomi.

Sekaumsekau es nâknoinâ kun Uab Esperanto, nmuî baelsonâ alekot he nahín sivilisasi (peradaban) humaf nua, lê a-nmatalun ma nmâmaub es nok es. Ahunte eslê hit mahonis tokan. Nane napèn pengaruh nâko hit tob in tradisi, moral ma toes, nane eslê, hit budaya lokal. Nuaë hit tapèni oras hit a-tloim kuk he tpil he tjail atuas (warga) pah-pinan natuin Uab Esperanto. Nmanua nnès nâko lê ahunut, amunit i natám nan "budaya pah-pinan" (budaya global), natuin in manifestasi (human) amanuat a-’sekê.

Sin lê a-npil "laistonegara dobel" natuin Uab Esperanto matekâ nak Esperantis. Sin nane tuaf lê ka ala fa nahín uab, me sini msâ a-npaek uab nane he nanaob komunikasi nok Esperantis abitin pah bian ma nmoê kontak nok budaya humâ-humâ, ma sin nane aktivis (ameup-amakoet) neu promosi ma panat-taus neu tenabfuaf uab internasional mesê ini.

Lekâ Uab Esperanto npoi nalail onanet, tuafin lê namót sini ‘noinâ nmulai nrasa parlút he nabuan pukan-pukan he npraktek uab nane, ma ntulun sin bian he nânoinâ kun ma nabeon sin sinmakat nane. Natuin tabu in lakat puknin nane nânaen ma bian nasitbokan ntean pah apaumaktin, te pukan feü bian a-msâ a-npoin piuta es onane munî i hit a-tmuî organisasi aktif natun-natun a-nbi pah-pinan nfunamnatéf. Nabuan nok Esperantis-sin, organisasi-sin lê i nforma (nbentuk) pah Esperanto, ma hit biasa ttek sin meupmakoet (aktivitas) tak "Neöt Esperanto" (Gerakan Esperanto).

Tânoinâ kuk Uab Esperanto, tjail Esperantis, ma trasa mlilê ahenut nâko Neöt Esperanto. Nâko Hit lakat ahunut, in lof Hiti msat!

------------------------
Pusat Studi Esperanto Indonesia: http://www.tejo.org/uea/indonezio
Milis Esperanto Indonesia: http://groups.yahoo.com/group/esperanto_indonesia
Esperanto Course: http://www.cursodeesperanto.com.br/
Liga Brasileira de Esperanto: http://www.esperanto.org.br/
Universal Esperanto Association: http://www.uea.org/
Esperanto multilingual: http://www.esperanto.net/
Informasi ntomneu Esperanto: http://www.esperanto.net/info/index_en.html
Esperanto Access: http://www.webcom.com/~donh/esperanto.html

Lulbás-tuis: Yohanes Manhitu, Moderator Milis Esperantis Pah Indonesia ini.