Nyong Fehuk deng Ama Dukun

Foto: https://www.austockphoto.com.au

Satu hari bagitu te, Nyong Fehuk bajalan dari kota pi dukun di satu kampong, sonde talalu jao. Sampe di sana, dia omong deng muka puruk di itu dukun. "Ini harim talalu makaditi deng beta, Ama. Kira-kira dia-pung cara karmana é biar-ko bisa talapas capát su." Tarús, itu dukun bale tanya sang dia babae, model ke polisi ada korek info. "Itu hari Bu lem dia pake apa, lem lokal ko lem impor?" Dengar dukun pung omong ju, Nyong Fehuk bingung. "Beta sonde lem pake apa-apa, Ama," Nyong Fehuk balas. Na, Ama Dukun omong lai palán-palán sa bilang, "Bagini á, Bu pulang pi ruma ko pikir ulang babae dolu, Bu su lem pake apa dan kira-kira Bu batúl-batúl mau ko dia talapas ko. Orang yang datang di sini tu biasa su siap memang deng informasi jalás dan keputusan su pasti. Kalo su beres, na Bu datang lai é. Itu sa, Bu." Kaluar dari Ama Dukun pung ruma te, Nyong Fehuk pikir sandiri ko heran-heran, ju omong dalam hati, "Tuheré! Ini bengkel sofa ko tampa praktek dukun? Heran sa!" 

(Yohanes Manhitu, Yogyakarta, 23 Februari 2015)