Ha’u iha saudades nafatin ba ó

Hosi: Yohanes Manhitu

Tan buat ida be ó komprende ona,
ha'u koko atu hamoos ó hosi memória
atu ó-nia lalatak ne’e lakon ho anin,
atu ó-nia naran more hosi neon.

Maibé tan forsa ruma iha laran ne’e,
ha'u seidauk bele halakon buat ida,
ne’ebé halo ha’u hanoin nafatin ó,
ne’ebé lori ha’u ba mehi ho ó.

Se ita susar hamoos pinta mihis
be foin kona uma-didin loron ida,
lalika husu ha’u sei susar ka lae
halakon relevu mahar laran nian.

To’o agora mós ha’u sei hanoin ó
maski dalan ba oin parese naktaka.
Só esperansa de’it maka sei buras.
Ha’u hakne’ak no hateke ba lalehan.

Kefa-Timór, fulan-Janeiru 2010