Dalan ida-ne’e sei naruk

Hosi Yohanes Manhitu

Tempu nia roda fila nafatin, lori ita ba futuru,
loron be liu tiha sai lembransa be la more,
no loron-aban, mistériu seidauk nakloke.
No ohin loron, ne’e tranzisaun badak.

Nu’udar ai-tahan nurak sira be nadikin
iha dadeer-saan kuandu maha sei ukun,
moris ne’e mosu ho ksolok no hamnasa,
hakonu laran kle’an sira ho esperansa.

Livru moris nian foin nakloke ba mundu,
no faefaen maibé sertu, tahan ba tahan
ita sei lee hodi hetan hatán ba ai-sasi’ik
be dala ruma hela to’o loromatan monu.

Karik ita tenke husik hela an, hanesan
kudaku be husik ninia uma toos maran
hodi bele halai lalais iha raiklaran ne’e
be luan ho foho aas be ita tenke sa’e.

Nu’udar karau-baka sira be husik luhan
baihira loromatan sa’e atu lori ba natar,
kriatura sira sei ba mundu liman rohan,
no loron ruma sei simu glória iha altár.

Maibé ohin loron, dalan sei naruk hela,
no rai-rahun manas sei taka ninia oin,
fatuk-musan sira mós la fó toleránsia.
Maski todan, lalehan hamaho nafatin.

Yogyakarta, 16 fulan-Jullu 2007