Thursday, June 30, 2011

Baur ruma iha memória

Hosi: Yohanes Manhitu

Haree fali sidade boot ida-ne’e,
ha'u lembra momentu ne’ebé
buat hotu-hotu parese foun
tan ha’u foin mai iha-ne’e.

Momentu ne’ebá ha’u laran-taridu
hetan dezafiu nu’udar foin-sa’e
dook hosi inan-aman no maluk sira,
tan de’it loron-aban nia ezijénsia.

Tuir dalan iha sidade nia laran,
loron uluk sira hanesan imajen,
mosu liña naruk ho kór barak,
forma baur ruma iha memória.

Hanoin fali loron uluk sira ne’e,
mosu tan liña seluk ho oin barak
be mai hosi rain nia lidun oioin.
Uluk, lisuk, ami buka matenek.

Kupang, 02 fulan-Juñu 2011

Iha sidade ida-ne’e



Hosi: Yohanes Manhitu

Iha sidade ida-ne’e ha’u hahú
hatene moris universidade nian,
kuru matenek ho balde mamuk
iha fatuk no akadiru sira-nia leet.

Iha sidade ida-ne’e ha’u hahú
aprende oinsá bele hamriik rasik
nu’udar ema ho responsibilidade
no buka dalan ba aban-bairua.

Iha sidade ida-ne’e ha’u hahú
buka maluk hosi fatin barak liu
no fahe ba malu istória oioin,
ne’ebé hakór dalan moris nian.

Iha sidade ida-ne’e ha’u hahú
koñese liután sá maka domin
maski destinu la fó biban luan
atu mehi furak sai realidade.

Iha sidade ida-ne’e ha’u hahú
hanoin hikas kona-ba futuru.
Se bele, ha’u sai sei sidadaun
iha fatin be uluk naran Cupão.

Kupang, 02 fulan-Juñu 2011