Moris hosi liafuan sira

Hosi: Yohanes Manhitu

Hori kleur ona ha’u toman 
moris hosi liafuan sira. 
Hosi letra no letra be hamutuk, 
ha'u goza liberdade ida.

Liafuan sira hanesan tudik: 
ema balu uza hodi serbisu, 
sira seluk uza hodi hakanek. 
Sira fó ha’u moris kmanek.

Hori kleur ona ha’u toman 
moris hosi liafuan sira. 
Hosi loron ba loron ha’u koko 
atu harii futuru ho liafuan sira.

Kefa-Timór, fulan-Janeiru 2010

Ó iha-ne’ebé?

Hosi: Yohanes Manhitu

Ó iha-ne’ebé, Alin doben,

bainhira malirin kalan nian

hamaluk ha’u iha sidade ki’ik,

be ha’u seidauk koñese didi’ak?

Ha’u koko atu buka sentidu kalan nian

hosi manduku no kela sira-nia lian,

be sai múzika saugati mai ha’u.

Koitadu, ó la mai hamaluk ha’u!

Bainhira buka sentidu kalan nian,

ha'u konsege komprende tomak

ó-nia prezensa nia arti mai ha’u:

ho ó, buat hotu-hotu sai furak.

Ó iha-ne’ebé, Alin doben,

bainhira solidaun maka belun

be hamaluk ha’u iha kalan naruk

ho ninia manta be falun metin ha’u?

Kefa-Timór, fulan-Janeiru 2010